நாவலப்பிட்டி இம்புல்பிட்டி தோட்டத்தில் உள்ள கைவிடப்பட்ட பங்களாவில் தனது காதலியின் கழுத்தை அறுத்து கொலை செய்த நபர் கம்பளையில் பொலிஸில் சரணடைந்துள்ளார்.

இந்தக் கொலை நேற்று  (22) இடம்பெற்றுள்ளதுடன், உயிரிழந்தவர் நாவலப்பிட்டி இம்புல்பிட்டிய தோட்டத்தில் வசித்து வந்த 39 வயதுடைய மூன்று பிள்ளைகளின் தாயாவார்.

கொலை செய்யப்பட்ட பெண் கம்பளை  பகுதியில் சந்தேக நபருடன் சுமார் 9 மாதங்கள் வசித்து வந்துள்ளார். பின்னர், தனது சட்டப்பூர்வமான கணவரின் வீட்டிற்கு திரும்பியுள்ளார்.

வீட்டில் இருந்த குறித்த பெண், வீட்டு வேலைக்காக வெளிநாடு செல்ல தயாராகி வந்துள்ளதாகவும் சந்தேக நபர் வெளிநாடு செல்வதற்கு கடும் எதிர்ப்பு தெரிவித்திருந்தமையும் பொலிஸார் மேற்கொண்ட விசாரணைகளில் தெரியவந்துள்ளது.

கொலை செய்யப்பட்ட பெண் வெளிநாடு செல்வதற்காக கிராம சேவகர் சான்றிதழ் பெறச் சென்றபோது, சந்தேக நபர் அவரை தொலைபேசியில் அழைத்து ஒரு கைவிடப்பட்ட வீட்டிற்கு வருமாறு கூறியுள்ளதுடன் அங்கு சென்ற பிறகு, அவரது கழுத்தை அறுத்து கொலை செய்துள்ளார்.

உயிரிழந்த பெண்ணின் சடலம் பிரேத பரிசோதனைக்காக நாவலப்பிட்டி மாவட்ட பொது மருத்துவமனையின் நீதித்துறை மருத்துவ பரிசோதகரிடம் அனுப்பப்பட்டுள்ளதாக நாவலப்பிட்டி பொலிஸார் தெரிவித்தனர்.