நாட்டில் மீண்டும் நெருக்கடியை உருவாக்கி ஒட்டுமொத்த செயற்பாடுகளையும் சீர்குலைக்க குழுவொன்று செயற்படுவதாக புலனாய்வு தகவல் கிடைத்துள்ளதாக பாதுகாப்பு இராஜாங்க அமைச்சர் பிரமித பண்டார தென்னகோன் நேற்று (ஜூலை 6) தெரிவித்தார்.

இந்த குழுக்களின் உறுப்பினர்கள் கடந்த வாரம் கண்டி அல்கடுவ பிரதேசத்தில் உள்ள பிரபல ஹோட்டல் ஒன்றில் செயலமர்வு ஒன்றை நடத்தியதுடன், ஆர்ப்பாட்டத்தின் போது இராணுவம் மற்றும் காவல்துறையினரை எவ்வாறு எதிர்கொள்வது என்பது குறித்து பங்கேற்பாளர்களுக்கு விசேட பயிற்சிகளை வழங்கியதாகவும் அவர் தெரிவித்தார்.

போராட்டத்தின் போது எதிர்ப்பாளர்கள், இராணுவம் மற்றும் காவல்துறைக்கு எவ்வாறு பதிலளிப்பது மற்றும் கண்ணீர்ப்புகை மற்றும் நீர் தாக்குதல்களை எவ்வாறு எதிர்கொள்வது என்பது தொடர்பான நடைமுறை மற்றும் தத்துவார்த்த பயிற்சி இங்கு நடத்தப்பட்டதாக தெரிவிக்கப்படுகிறது.

நாட்டை சீர்குலைப்பதற்கு ஆதரவளிக்கும் பல்வேறு குழுக்கள் எதிர்காலத்தில் வேலைநிறுத்தத்தை ஆரம்பிக்க திட்டமிட்டுள்ளதாக புலனாய்வு அறிக்கைகள் மூலம் தெரியவந்துள்ளதாகவும் அவர் குறிப்பிட்டுள்ளார்.

இந்த குழுக்கள் பாரிய நெருக்கடியை எதிர்கொண்டு நாட்டை மீளவிடாமல் தடுக்க முயற்சிப்பதாகவும் புலனாய்வுப் பிரிவினர் இந்த அனைத்து குழுக்களின் செயற்பாடுகளையும் தொடர்ந்து கண்காணித்து வருவதாகவும் பாதுகாப்பு இராஜாங்க அமைச்சர் தெரிவித்தார்.

புலனாய்வுத் துறை பலவீனமடைந்துள்ளதாகவும், நாட்டின் தேசிய பாதுகாப்பு தொடர்பில் பிரச்சினைகள் ஏற்பட்டுள்ளதாகவும் பல்வேறு தரப்பினர் தெரிவித்த போதிலும், புலனாய்வுத் துறை மிகவும் பலமாக இருப்பதாகவும் அவர் குறிப்பிட்டுள்ளார்.

நாட்டில் இடம்பெற்ற ஈஸ்டர் தாக்குதல்கள் தொடர்பில் புலனாய்வுத் திணைக்களத்தின் மீது குற்றம் சுமத்தப்பட்டுள்ளதாகவும், ஆனால், தாக்குதல் தொடர்பில் புலனாய்வுத் தகவல்கள் கிடைத்த போதிலும், எவ்வித நடவடிக்கையும் எடுக்கப்படவில்லை எனவும் அவர் தெரிவித்துள்ளார்.

இதன்படி, புலனாய்வுத் துறையின் பலவீனத்தால் ஈஸ்டர் தாக்குதல் நடத்தப்படவில்லை என்று தான் கருதுவதாக அவர் மேலும் கூறினார்.