சிறுவயதில் தன்னை அன்புடன் பராமரித்த ஆயாவை 38 ஆண்டுகளுக்குப் பிறகு தேடிக் கண்டுபிடித்த பிரெஞ்சு நபரின் நெகிழ்ச்சியான கதை சமூக ஊடகங்களில் பலரது கவனத்தையும் ஈர்த்துள்ளது.

அவரது குடும்பம் ஐவரி கோஸ்டில் வசித்த காலத்தில், குறித்த பெண் அவரைத் தனது சொந்தக் குழந்தையைப் போன்று அன்புடனும் அக்கறையுடனும் கவனித்து வந்ததாகத் தெரிவிக்கப்படுகிறது. பின்னர் குடும்பம் பிரான்சுக்குத் திரும்பியதால் இருவருக்குமிடையிலான தொடர்பு முற்றிலும் துண்டிக்கப்பட்டது.

ஆண்டுகள் கடந்தபோதிலும், தனது குழந்தைப் பருவத்தில் கிடைத்த அன்பையும் பாதுகாப்பையும் மறக்காத அந்த நபர், அவரை எப்போதும் தனது “இரண்டாவது தாய்” எனக் கருதி வந்துள்ளார். பல வருடத் தேடலுக்குப் பின்னர், மேற்கு ஆப்பிரிக்காவில் எளிய வாழ்க்கை நடத்திவந்த அவரை இறுதியாகக் கண்டுபிடித்துள்ளார்.

நீண்ட இடைவெளிக்குப் பின்னர் இருவரும் சந்தித்த தருணம் கண்ணீர், அணைப்புகள் மற்றும் பழைய நினைவுகளால் நிறைந்திருந்ததாகக் கூறப்படுகிறது. அந்த உணர்ச்சிப்பூர்வமான சந்திப்பு தொடர்பான காட்சிகளும் இணையத்தில் பரவலாகப் பகிரப்பட்டு வருகின்றன.

தன்னை வளர்த்ததற்கான நன்றியை வெளிப்படுத்தும் வகையில், அவருக்கு ஒரு கோடி CFA பிராங்குகள், புதிய கார் மற்றும் வாழ்நாள் முழுவதும் உதவும் மாதாந்திர நிதியுதவியையும் அந்த நபர் ஏற்பாடு செய்துள்ளதாகப் பகிரப்பட்ட தகவல்கள் தெரிவிக்கின்றன.

காலம் மற்றும் தூரம் எவ்வளவு பிரித்தாலும், உண்மையான அன்பையும் நன்றியுணர்வையும் அழிக்க முடியாது என்பதை இந்தச் சம்பவம் மீண்டும் நினைவூட்டியுள்ளது. சில உறவுகள் இரத்தத்தால் அல்ல; அன்பு, அக்கறை மற்றும் மனிதநேயத்தால் உருவாகின்றன.