ஊவா பரணகம தேர்தல் தொகுதிக்குட்பட்ட கலஹகம பகுதியிலுள்ள பெண்ணொருவர் வெள்ளத்தில் அடித்துச் செல்லப்பட்டு காணாமல் போயுள்ளதாக தெரிவிக்கப்பட்டுள்ளது.

நேற்று (14) கலஹகம பகுதியில் உள்ள சீதா ஆற்றைக் கடக்க முற்பட்டபோதே குறித்த பெண் வெள்ளத்தில் அடித்துச் செல்லப்பட்டுள்ளார்.

வேலைக்குச் சென்றுவிட்டு மீண்டும் வீடு திரும்பும் வழியில் ஐந்து பேருடன் இணைந்து சீதா ஆற்றைக் கடக்க முற்பட்டுள்ளார். இதன்போது, ஏற்பட்ட பலத்த நீரோட்டத்தில் அவர் அடித்துச் செல்லப்பட்டுள்ளதாகத் தெரிவிக்கப்படுகிறது. 

மூன்று பிள்ளைகளின் தாய்

காணாமல் போன பெண்ணைத் தேடும் பணிகளில் பிரதேச மக்களும் காவல்துறையினரும் இணைந்து ஈடுபட்டு வருகின்றனர். எனினும், இதுவரை அவரைக் கண்டுபிடிக்க முடியவில்லை எனத் தெரிவிக்கப்படுகிறது. 

தெல்ஹவாடிகம பகுதியைச் சேர்ந்த கூலித் தொழிலாளியான குறித்த பெண், மூன்று பிள்ளைகளின் தாயார் எனத் தெரிவிக்கப்படுகிறது.

இதேவேளை, பதுளை மாவட்டம் உள்ளிட்ட நாட்டின் பல பகுதிகளிலும் சீரற்ற வானிலை நிலவி வருவதுடன், கடந்த 24 மணித்தியாலங்களாகத் தொடர்ச்சியாக மழை பெய்து வருவதால் மக்களை அவதானத்துடன் இருக்கும்படி அறிவுறுத்தப்பட்டுள்ளனர்.