நாட்டில் நிலவி வரும் சீரற்ற வானிலை காரணமாக தெதுறு ஓயா, லுணுகம்வெஹேர மற்றும் ராஜாங்கனை நீர்த்தேக்கங்களின் வான் கதவுகள் இன்று (09) காலை முதல் திறக்கப்பட்டுள்ளதாக நீர்ப்பாசனத் திணைக்களம் தெரிவித்துள்ளது.

நீர்ப்பாசனத் திணைக்களம் வெளியிட்டுள்ள அறிக்கையின்படி, தெதுறு ஓயா நீர்த்தேக்கத்தின் 4 வான் கதவுகள் தலா 3 அடி வீதம் திறக்கப்பட்டுள்ளன. இதன் மூலம் விநாடிக்கு 8,400 கன அடி நீர் வெளியேற்றப்படுகிறது.

அதேபோல், லுணுகம்வெஹேர நீர்த்தேக்கத்தின் 6 வான் கதவுகளும் திறக்கப்பட்டுள்ளன. இதில் 2 கதவுகள் தலா 4 அடி வீதமும், மற்ற 4 கதவுகள் தலா 8 அடி வீதமும் திறக்கப்பட்டுள்ளதாக தெரிவிக்கப்பட்டுள்ளது. 

இதன் மூலம் விநாடிக்கு 2,915 கன அடி நீர் வெளியேற்றப்படுவதால், கிரிந்தி ஓயாவைப் பயன்படுத்தும் மக்கள் அவதானத்துடன் இருக்குமாறு அறிவுறுத்தப்பட்டுள்ளது.

மேலும், ராஜாங்கனை நீர்த்தேக்கத்தின் 6 வான் கதவுகளும் திறக்கப்பட்டுள்ளன. இதில் 4 கதவுகள் தலா 2 அடி வீதமும், மற்ற 2 கதவுகள் தலா 3 அடி வீதமும் திறக்கப்பட்டுள்ளன. 

இதன் மூலம் விநாடிக்கு 4,542 கன அடி நீர் வெளியேற்றப்படுவதாக நீர்ப்பாசனத் திணைக்களம் தெரிவித்துள்ளது.

இதனால் குறித்த நீர்நிலைகள் மற்றும் ஆறுகளுக்கு அருகிலுள்ள மக்கள் பாதுகாப்புடன் இருக்குமாறும் அதிகாரிகள் எச்சரிக்கை விடுத்துள்ளனர்.