தீபாவளி பண்டிகையையொட்டி சென்னையில் பல்வேறு பகுதிகளில் குவிந்துள்ள பட்டாசுக் கழிவுகளை அகற்றும் பணியில் சென்னை மாநகராட்சி தீவிரமாக ஈடுபட்டுள்ளது.

தீபாவளி கொண்டாட்டத்தின்போது வெடிக்கப்பட்ட பட்டாசுகளால் சாலைகள், தெருக்கள் மற்றும் மழைநீர் வடிகால்களில் அதிக அளவிலான கழிவுகள் தேங்கியுள்ளன. அவற்றை அகற்றி நகரைத் தூய்மைப்படுத்தும் பணிகள் முழுவீச்சில் நடைபெற்று வருகின்றன.

600 தூய்மைப் பணியாளர்கள் – 350 வாகனங்கள்!

பட்டாசுக் கழிவுகளைச் சேகரித்து பாதுகாப்பாக அப்புறப்படுத்துவதற்காக சென்னை மாநகராட்சி சார்பில் 600 தூய்மைப் பணியாளர்கள் மற்றும் 350 வாகனங்கள் பணியில் ஈடுபடுத்தப்பட்டுள்ளன.

மேலும், பட்டாசுக் கழிவுகளைத் தனியாகச் சேகரிப்பதற்காக 50 கிலோ கொள்ளளவு கொண்ட 30 ஆயிரம் பிரத்யேகப் பைகள் தூய்மைப் பணியாளர்களுக்கு வழங்கப்பட்டுள்ளன.

பகல் நேரம் மட்டுமின்றி இரவு நேரங்களிலும் இயந்திரங்கள் மற்றும் தூய்மைப் பணியாளர்கள் மூலம் சிறப்புத் தூய்மைப் பணிகள் மேற்கொள்ளப்பட்டு வருகின்றன.

600 டன் பட்டாசுக் கழிவுகள் சேரும் என எதிர்பார்ப்பு!

கடந்த ஆண்டு தீபாவளியின்போது மூன்று நாட்களில் 200 டன்னுக்கும் அதிகமான பட்டாசுக் கழிவுகள் சேகரிக்கப்பட்டன.

இந்த ஆண்டு தீபாவளிக் கொண்டாட்டங்களால் சென்னையில் சுமார் 600 டன் பட்டாசுக் கழிவுகள் சேரும் என மாநகராட்சி எதிர்பார்க்கிறது.

பொதுமக்களுக்கு மாநகராட்சி வேண்டுகோள்!

பட்டாசுக் கழிவுகளை வீட்டுக் குப்பைகளுடன் சேர்க்காமல் தனியாகப் பிரித்து தூய்மைப் பணியாளர்களிடம் ஒப்படைக்க வேண்டும் என மாநகராட்சி அறிவுறுத்தியுள்ளது.
 

மேலும், பட்டாசுக் கழிவுகளைச் சாலைகள், தெருக்கள் மற்றும் மழைநீர் வடிகால்களில் கொட்ட வேண்டாம் என்றும் பொதுமக்களிடம் கேட்டுக்கொள்ளப்பட்டுள்ளது.

கடந்த 5 ஆண்டுகளில் பட்டாசுக் கழிவுகள் சேகரிப்பு!

சென்னையில் கடந்த ஐந்து ஆண்டுகளில் சேகரிக்கப்பட்ட பட்டாசுக் கழிவுகளின் அளவு:

• 2021 – 138 டன்
• 2022 – 211 டன்
• 2023 – 210 டன்
• 2024 – 319 டன்
• 2025 – 225 டன்

பட்டாசுகளில் உள்ள வெடிமருந்து எச்சங்கள் மற்றும் ரசாயனப் பொருட்கள் சுற்றுச்சூழலுக்கு பாதிப்பை ஏற்படுத்தக்கூடும் என்பதால், அவற்றைத் தனியாகச் சேகரித்து கும்மிடிப்பூண்டியில் உள்ள அபாயகரமான கழிவுகள் மேலாண்மை மையத்திற்கு அனுப்பி வைக்கும் நடவடிக்கையையும் மாநகராட்சி மேற்கொண்டு வருகிறது.